Pagtatagpo ng Kasaysayan at Panitikan sa mga Tudtulan ng mga Sinaunang Maguindanaon

Abstract

Pinatunayan sa papel na ito ang matalik na ugnayan ng panitikan at kasaysayan. Gamit ang pamaraang indehinus o pangkatutubo, nangolekta ng mga tudtulan(sinaunang kuwentong bayan ng mga Maguindanaon) mula sa bibig ng mga matatandang Maguindanaon,isinatitik, at isinalin sa Filipino.Matapos makuha ang larawan ng mga Maguindanaon mula sa mga kuwentong bayan,itinapat  ito sa kasaysayan upang mapatunayan ang pamamalagay na  may kakayahan ang panitikan na matapat  na ipakilala ang kasaysayan at may kakayahan din itong  mamagitan sa kasaysayan. Hinanap ang mga nawawalang tauhang nabanggit sa parehong panitikan at kasaysayan sa katauhan nina Tabunaway at Mamalu at ang representasyon ng mga kababaihan sa katauhan ni Salabanun sa panahong hindi pa nakayakap sa relihiyong Islam ang mga Maguindanaon hanggang sa unang panahon ng pagsapit ni Kabungsuwan sa Maguindanao. Parehong binanggit sa matandang panitikan at kasaysayan na nag-ugat ang mga Maguindanaon mula sa mga Manobo at Teduray .Parehong binangit sa panitikan at kasaysayan ang pamumuno ng  mga lokal na pinunong sina Mamalu at Tabunaway at ang pananakop sa lugar ni Kabungsuwan gamit ang pangangalakal at higit sa lahat ang pagpapayakap sa pananampalatayang Islam. Tanging sa panitikan lamang naitanghal ang pagkakapantay-pantay ng lalaki at babae bilang pinuno, hindi ito nakita sa kasaysayan. Hindi naging malinaw ang pagkawala ni Mamalu sa kasaysayan, na ayon sa panitikan ay namundok dahil sa pagtutol sa pananampalatayang Islam. Kung gayon, mahihinuhang, may sinasabi ang panitikan na hindi sinasabi ng kasaysayan at bise-bersa ngunit nagtutulungan ang isa’t isa upang mapalitaw ang mahigpit nilang ugnayan.